Сибирская православная газета
Главная страницаДокументыЗакон БожийЗдоровьеИконы ИсторияКультураЛитератураМиссионерствоМолитвыХрамы Святые угодникиРецепты АвторыПраздники и посты Проблемы насущныеОбразование Разное  Карта сайта
  • Сила простой молитвы
  • Детская молитва
  • Празднование Пресвятей Владычице нашей Богородице ради иконы Ея, именуемой “Абалацкая”
  • С любовью и молитвой
  • Празднование Пресвятей Владычице нашей Богородице ради иконы Ея, именуемой “Абалацкая” Память сей дивной иконы 27.XI-10 декабря 20.VII-2 августа

         НА МАЛОЙ ВЕЧЕРНИ

         На Господи, воззвах: стихиры, глас 1:

         Небесное торжествует сословие/ умом человеческим непостижно явление Богоматере,/ с нимиже и мы празднуем днесь/ во Абалаце явльшийся образ Приснодевы/ Чистыя Богородицы.

         Божественным мановением/ чудесное облачнаго столпа явление/ наставляет вдовицу чистую/ о Твоем знамении, Пренепорочная, людем поведати,/ да суеверия тьму отгнавши,/ истинный верным свет покажеши спасения. Кто по достоинству щедроты Твоя исповесть, Чистая?/ Действием бо Сына Твоего/ от столпа облачнаго/ призвавши вдовицу к зраку Твоего пресветлаго лица,/ во образе на воздусе явльшагося.

         Слава, и ныне, глас 4:

         Пресветлое Твое явление,/ Пренепорочная Богородице,/ лик ангельский песнословит на Небеси/ и человеческий род восхваляет на земли,/ яко, Мати сущи Живота,/ молиши о нас Сына Твоего Христа Бога нашего,/ на Тя бо крепкую надежду по Бозе возложихом,/ Знамение неложное спасения нашего.
    На стиховне стихиры, глас 2:
    Веселися, земле Сибирская,/ яко веселия твоего и спасения Знамение/ от облачнаго столпа/ в наставление пути истиннаго приходит.
    Стих: Помяну имя Твое/во всяком роде и роде.
    Ты земнородных прописуешися защищение,/ явльшися бо в столпе облачном/ преестественно во Абалаце,/ Прибежище еси всем.
    Стих: Слыши, Дщи, и виждь,/ и приклони ухо Твое.
    Отложим, вернии, печаль,/ се бо вторый столп указующий/ якоже некогда Моисеови/ на спасение грешным является.
    Слава, и ныне, глас тойже:
    Абалака место освящения,/ Богом избранное,/ росоносною Духа благодатию освящено есть,/ Деве во украшение,/ грешным во спасение.
    Тропарь писан на велицей вечерни. На малом повечерии кондак,
    глас 8: Странное и Богоприятное светоносного образа Твоего явление: зри по 3-й песни канона.

         НА ВЕЛИЦЕЙ ВЕЧЕРНЕ

         Блажен муж: 1-й антифон.

         На Господи, воззвах: стихиры, глас 1: Избранное место плодоносно чудесы Твоими/ явила еси Абалаку Пречистая Дево Богородице,/ повелела еси нову церковь людем Твоим создати,/ да восстанут от сна греховнаго,/ укрепляеши бо колена и руки расслабленныя/ всемощным Твоим мановением/ во спасение наше и утверждение.

         Крайним Своим благоутробием/ человеческий род управляя Всевидец Бог/ к содержанию и спасению/ многую благодать дает Ти, Чистая./ Вдовица столп облачный узревши,/ глаголет явление Твое, во Абалаце бывшее./ О благонадежнаго Твоего заступления!/ О, Божия толикаго в Тебе величия, Дево Чистая,/ чудесная в немощи Помощнице. Странным Своим советом, Нетленная Дево,/ устрой Тя Владыка всех/ в предстательство земным известное./Столп облачный Израилю предводитель бысть/ в землю обетованную,/ всемощное моление Твое возносит верныя/ в Небесное блаженство./О преславнаго Твоего бдения!/ О усерднаго к нам, грешным, рачения, Дево Чистая,/Божие к смертным благоволение!

         Глубиною мудрости избра Тя, Всечистая,/ всея твари Зиждитель Бог/ и постави во Абалаце Врачебницу безмездную./ Кто бо, в нужде притекали к Тебе,/ смертоносныя не уврачует язвы;/ Источник бо нетления бывши,/ излияла еси миро благодати многоцелебное/ верным в духовное веселие,/ болезней во укрощение, Дево Чистая,/ твердое веры Православныя утверждение. Человеколюбную Свою милость/ к человеческому роду показуя,/ Христос Господь благоволением и Советом Отчим неиспытанным/ Пренепорочную и Очищенную Духом Святым/ являет во иконе чудотворней/ в защищение верным Матерь Свою./ О толикаго промысла, щедролюбия и таинства Божия!/ О, нетленнаго девственныя благодати сокровища!/ Имже обогативши ненадежные души наша,/ представи я святы Сыну Твоему, Богоневестная.

         Облак невещественный вдовица видя в вещественном телеси,/ изумевающи Тя зрит, Всечистая,/ и, узрев Божественное чуднаго Твоего явления действие,/ за милосердие многое к человеческому естеству во благодати бывшее,/ припадая со усердием и теплыми слезами,/ молящеся, глаголя:/ радуйся, чудесное душ человеческих очищение.

         Слава, и ныне, глас 8:

         Приидите, вернии,/ чудесное пресветлаго образа/ во Абалаце восхвалим явление,/ се столп облачный,/ имже свобождаемся лютыя мысленнаго фараона работы./ Се камень горы Хорива,/ от негоже вместо сладких вод/ безценное на укрощение недугов излияно благодати миро,/ се пустыня животныя манны,/ еюже насытивши нас духовно. Пречистая,/ сподоби и Царствия Сына Твоего. Вход. Прокимен дне. И чтения 3.

         Бытия чтение (глава 28):

         Изыде Иаков от студенца клятвенного и иде в Харрань. И обрете место, и спа тамо, зайде бо солнце, и взят от камения места того, положи возглавие себе, и спа на месте оном, и сон виде: и се лествица утверждена на земли, еяже глава досязаше до небес, и Ангели Божий восхождаху и нисхождаху по ней. Господь же утверждашеся на ней, рече: Аз Бог Авраамов, отца твоего, и Бог Исааков, не бойся, земля, идеже ты спиши на ней, тебе дам ю и семени твоему. И будет семя твое, яко песок земный, и распространится на море, и ливу, и север, и на востоки. И возблагословятся о тебе вся колена земная и о семени твоем. И се Аз с тобою, сохраняяй тя на всяком пути, аможе аще пойдеши. И возвращу тя в землю сию, яко не имам тебе оставити, дондеже сотворити Ми вся, елика глаголах тебе. И воста Иаков от сна своего и рече: яко есть Господь на месте сем, аз же не ведех. И убояся, и рече: яко страшно место сие, несть сие, но дом Божий, и сия врата небесная.

         Исхода чтение (глава 13,18—22):

         Обведе Бог люди путем, иже в пустыню к Чермному морю. Пятаго же рода изыдоша сынове Израилевы от земли Египетския. И взя Моисей кости Иосифовы с собою, клятвою бо закля Иосиф сыны Израилевы, глаголя: присещением присетит вас Господь и изнесете отсюду кости моя с собою. Воздвигшеся же сынове Израилевы от Сокхофа, ополчишася во Офоме при пустыни. Бог же вождаше их: в день убо столпом облачным, показати им путь, нощию же столпом огненным, светити им. И не оскуде столп облачный во дни и столп огненный нощию пред всеми людьми.

         Исхода чтение (глава 31,-8):

         Вниде Моисей в гору Божию Хорив. Явися же ему ангел Господень в пламени огненне из купины: и виде яко купина горяше огнем и купина не сгораше. Рече же Моисей: пришед узрю видение великое сие, что яко не сгорает купина; Якоже виде Господь, яко приступает видети, призва его Господь из купины, глаголя: Моисее, Моисее. Он же рече: что есть; И рече: не приближися семо: иззуй сапоги от ногу твоею: место бо, на немже ты стоиши, земля свята есть. И рече ему: Аз есмь Бог отца твоего, Бог Авраамов, и Бог Исааков, и Бог Иаковль. Отврати же Моисей лице свое, стыдяшебося зрети пред Богом. Рече же Господь к Моисею: Видя видех озлобление людей моих, иже во Египте, и вопль их услышах от насильствующих в делех: Вем бо болезни, их и снидох еже изъяти их от руки египтян, и извести их от земли оныя, и ввести их в землю благу и многу, в землю, точащую мед и млеко.

         На литии стихиры, глас 6:

         Кто, сицевое преславное чудо/ видя, не удивится?/ Или кто благоутробие Пречистыя разсуждаяй, не ужаснется./ Яко Дева Всенепорочная/ премени гнев Божий на милость/ и дарова людем Своим молящимся утешение/ и проста тещи поток водный/ и затворишася источницы бездны./ Но, о Благоутробная Владычице!/ Печали сопротивление,/ скорбь на радость выну претворяющая,/ даждь на враги победу стране нашей/ и всем людем одоление лютых страстей,/ лишающих надежды спасения. Глас 2: Приидите, Сибирстии народи,/ и хвалитеся, с веселием ликовствующе,/ Божия бо Мати вас милостивно посети чудотворным Своим образом,/ имже дарует в нуждах пособие,/ в скорбех исцеление,/ в бедах избавление/ и всем нам подает велию милость.

         Слава, и ныне, глас 8:

         Светися, славный граде Тобольск,/ обретая близ себе обитель сию,/ яже во Абалаце,/ в нейже есть светило велие, присноприходящее к тебе,/ Ангели сея трепещут, и человецы Тую воспевают:/ радуйся, неисповедимая радосте всем. Святая Дево;/ радуйся, образом Своим святым нас просвещающая;/ радуйся, всем исцеление во всяких скорбех подавающая;/ радуйся, от всяких бед и зол избавляющая;/ радуйся, всем похвало,/ и нам, верным, утверждение, и душам спасение;/ радуйся, Владычице, Знамение милости Твоея нам являющая.

         На стиховне стихиры, глас 8:

         Что Тя наречем, Богородице./ Зарю ли утреннюю,/ бодрствуеши бо непрестанно теплыми к Богу молитвами./ Столп ли облачный, души покрывающий./ Или землю, Хлеб Жизни произращающую./ Моли спастися душам нашим. Стих: Освятил есть/селение Свое Вышний.

         Что Тя наречем, Богородице Дево/ Цвет ли рая Божественнаго,/ яко Абалак украсила еси./ Воню ли благоухания сладкаго,/ яко обитель Свою облагоухала еси./ Сосуд ли дивныя масти,/ яко миро целебное благодати излияла еси,/ недужным врачевание подающи./ Моли Сына Твоего, Христа Бога нашего, спастися душам нашим.

         Стих: Бог посреде его/ и не подвижится.

         Что Тя наречем, Богородице./ Источник ли животворных вод,/ яко Ты духовную утоляеши жажду./ Стену ли крепку,/ яко Ты Россию и град Тобольск защищаеши/ и обитель Абалакскую спасаеши./ Твердь еси грешником известнейшая,/ возводящая к Небеси верныя,/ моли Христа Бога спастися душам нашим.

         Слава, и ныне, глас тойже:

         Радуйтеся, Сибирстии народи,/ и все человеческое, ликуй, естество,/ яко Пречистыя Девы честнаго образа явлением во Абалаце/ град Тобольск спасается./ Сего ради вси, от належащих нужд избавляеми,/ вопием Владычице:/ радуйся, благих виновная, известное христиан упование.

         На благословении хлебов, тропарь, глас 4:

         Днесь светло сияет во Абалаце/ образ Твой Пречистая Дево Богородице,/ и, яко солнце незаходимое,/ всегда верным подадеся,/ Егоже видевши на воздусе с предстоящими/ святителем премудрым Николаем/ и преподобною Мариею Египетскою,/ вдовица моляшеся Ти со слезами./ И мы, к Тебе притекающе, зовем:/ мир обители Твоей даруй// и душам нашим велию милость.

         На утрени

         На Бог Господь: тропарь Богородицы трижды. По 1-м стихословии седален, глас 4:

         Пресветлаго образа Твоего явление во Абалаце радость приносит всем верующим, и град Тобольск скорбей и напастей свобождается, богатство благости несказанно во обители процветает. К Нейже вси, бед избавльшеся лютых, купно с Гавриилом возопиим; радуйся, Благодатная! Из Тебе бо спасение Христос Бог наш, естество наше приемый, уготова нам, Егоже моли спастися душам нашим.

         Слава, и ныне, той же.

         По 2-м стихословии седален, глас 4:

         Светоносным явлением Твоим и божественным осенением покрый славящия Тя и ум к содержанию крепкому истиннаго благочестия настави, Пренепорочная Дево, неложна бо еси миру всему Предводительница к вечному радованию. Сего ради празднуем любовию вси явление Твоего образа, славословяще Тя: не лиши нас Царствия Сына Твоего, Едина Благословенная.

         Слава, и ныне, тойже.

         По полиелеи седален, глас 8:

         Величие Твое кто исповесть, Всенепорочная Дево? Явлением бо Твоим всю удивила еси Россию, от иконы бо Твоея истекшая благодать многия уврачева недуги и исцели болезни. О Всемилостивая Владычице! Не отрини нас и ныне в бедах сущих от Твоего заступления, но молитвами Твоими защити и спаси, страну Российскую миром огради, да Тобою хвалящеся и все упование на Тя возлагающе, не постыдимся во веки.

         Слава, и ныне, той же.

         Степенна, 1-й антифон 4-го гласа. Прокимен, глас 4: Помяну имя Твое/ во всяком роде и роде. Стих: Слыши, Дщи, и виждь, и приклони ухо Твое. Всякое дыхание: Евангелие от Луки, зачало 4.

         По 50-м псалме стихира, глас 6:

         Ныне наста день Твой, Пречистая,/ торжествуйте, людие,/ се бо Светоносный образ на воздусе чудесне является,/ и столпом облачным видимо утверждается/ днесь правило веры и образ кротости духовныя сказуется/ днесь сердечное к Богу обращение совершается/ и полнота покаяния проповедуется/ во спасение душ наших.

         Канон,глас 8. Песнь 1

         Ирмос: Воду прошед, яко сушу/ и египетского зла избежав/ израильтянин вопияше:/ Избавителю и Богу нашему поим. Ум мой, многими напастьми помраченный, просвети, Дево, Свет рождшая Божественный, волю, в добродетели унывающую, воспламени священною любовию, память, в славословии изнемогающую, укрепи, да пресветлое Твое во Абалаце явление воспою достойно, Чистая. Храме Трисолнечнаго Света прекрасный, украси моя чувства, молюся, да всеми чувствы целомудрен сый, честное Твое во Абалаце образа Знамение целомудренно воспою, Чистая.

         К Твоей пресветлаго образа иконе припадаю, окаянный: душу мою просвети, яви и тело нескверно и, от лютых мя недугов свободивши, покажи причастника наследия Небеснаго, Богоневестная.

         Якоже столпом облачным доброту Твоего образа явила еси вдовице смиренней, тако и ныне росою благодати являеши верным Твое скорое предстательство и заступление.

         Призри убо на рабы, призывающия Тя и требующия Твоея помощи, Благодатная, даруй стране Российстей на враги державное одоление, виновна бо еси всех благих, вечную благость нам воплотившая, Небеси хвало и миру Помощнице.

         Песнь 3

         Ирмос: Небесного круга Верхотворче, Господи,/ и Церкве Зиждителю,/ Ты мене утверди в любви Твоей,/ желаний краю, верных утверждение,/ Едино Человеколюбче.

         Низложи во мне налоги бесовския, гордость в добродетелех, лицемерие в святости, тщеславие во бдении, высокоумие в благоговении и неблагодарность в благодеяниих Сына Твоего, Едина Всепетая Дево.

         Странна мя любочестия сотвори, молю Тя, Дево, и чужда любопытства о человеческих согрешениих, дерзость и излишнее на милость Сына Твоего упование отдали от мене, да достойны Сыну Твоему плоды принесу, едина Пречистая.

         Начало и худость моего естества познавая, молю Тя, Дево, даждь ми презрение самолюбия, бегство человеческия хвалы, познание собственнаго греха и собственныя немощи, Едина Богоблаженная.

         Краткий всех вещей и всего мира смертнаго конец и мучение будущее за суету деяний тщеславных помышляти сподоби мя, Дево, да благодатиго Сына Твоего к пути истиннаго покаяния наставлен, вечнаго избегну проклятия, Пренепорочная.

         Ин кондак, глас 8:

         Странное и богоприятное образа Твоего явление, Пречистая Дево Богородице,/ с верою взирающим бывает известное чаяние спасения,/ столпом бо облачным являющи предстательство,/ неусыпное и теплое за ны к Богу возсылаеши моление,/ имже от всяких бед избави, молимся,/ да радостными усты вопием Ти вси:/ радуйся, Владычице, Знамение милости Твоея нам являющая.

         Седален, глас 4:

         Столп Твой облачный едину печать благодати Твоея сильнейшую мним, Всенепорочная, сею бо в соблюдение заповедей Сына Твоего и Бога печатавши верных сердца прекрепко, да не враг, хулящий имя Твое, преодолев лестию, поработит ны, рабы Твоя, в погибель кромешнюю. Но поспешеством благости Твоея, с Твоим знамением, покажемся имениты наследницы Царствия Нетленнаго, Пречистая Дево.

         Слава, и ныне, глас 8:

         Возбранное нам и дивное избавление даровася, образ Твой честный, Преблагословенная Госпоже Дево Богородице к немуже мы взирающе, сице к Тебе зовем: радуйся, прибежище наше, и упование, и спасение; радуйся, красото и славо обители Абалацкия и всея Сибири прибежище и защищение; радуйся, Владычице, Знамение милости Твоея нам являющая.

         Песнь 4

         Ирмос: Услышах, Господи,/ смотрения Твоего таинство,/ разумех дела Твоя/ и прославих Твое Божество. Жестокосердием отягченнаго мя облегчи, немилосердием к требующим окамененную утробу мою умягчи, бурею сребролюбия объятаго мя утиши, Богоневестная Владычице.

         Во уповании тленных и временных вещей не остави мя и пламень хищения неправеднаго, бездною милосердия Твоего покрывши, угаси во мне, Едина Приснодево.

         Идолослужение в лихоимании и безбожность в заблуждении истиннаго благочестия и Православныя веры потреби от православных, Владычице, и вконец разори от единоверных, да единодушно восхвалим Тя, Едина Приснодево.

         Ум мой, молю Тя, благоустрой к познанию Единаго Сущаго Бога, к разсмотрению вечных благ, и щедролюбие даруй ми, якоже Тавифе, и благодатию Христовою украси мя, якоже Корнилия сотника, Едина Приснодево.

         Песнь 5

         Ирмос: Просвети нас повелении Твоими, Господи,/ и мышцею Твоею высокою/ Твой мир подаждь нам,/ Человеколюбче. Огнь нечистоты и всякия скверны во мне разжигательный морем благости Твоея потопи, и мглу греховную разжени, и сердце мое радости исполни, Всенепорочная.

         Срамословию безобразному не даждь во мне места, Владычице,селение соблазнов разори, храм мя чистоты и всякаго благочестия соделай, да чистыми усты величаю Тя выну, Всенепорочная. Смерть, суд, геенну, Царствие Небесное в памяти моей углуби, Владычице, да поне последняя сия в памяти содержа, налоги лютых беззаконий оставлю и по смерти моей получу Тобою Царство Небесное, ныне же величаю Тя присно, Едино души моея упование. Любовь сея жизни преизлишнюю и временнаго плотскаго покоя рачение отложи от мене, молю Тя, Чистая, да суетнаго помышления избег, Тобою получу нетленное на Небеси богатство, Едино души моея упование.

         Песнь 6

         Ирмос: Молитву пролию ко Господу/ и Тому возвещу печали моя,/ яко зол душа моя исполнися/ и живот мой аду приближися,/ и молюся, яко Иона:/ от тли, Боже, возведи мя. Радости, к преогорчению ближняго низвлекущия, чужда мя соделай, Пречудная Царице, о нестроениих искренняго без печали быти не допущай мене. Человеколюбивая Владычице, и врагов злодействия избави мя, прилежно молю Тя, Всенепорочная. Зависти в помысле моем не даждь вкоренятися, рождшаяся от кореня свята, Дево, и братоненавидения избави мя, Чистая, да не завистию диаволею, принесшею смерть в мир, помрачен быв, лишуся Божия благодати и жизни вечныя, Всенепорочная. Равнодушие в бедах положи во мне, Всечистая, с радующимися в благополучии духовную радость, к сетующим в злоключении сожаление даруй ми. Пресвятая, и братолюбие по томужде естеству и по приобщению тояжде благодати Христовы низпосли ми свыше, любве пучину рождшая Дево.

         Желание крайнее согрей во мне всякому по естеству и по имени Христову от души благотворити, Благая, да не како злоб лютых душа моя исполнится, и живот мой аду приближится, и предан буду без милости, яко не сотворивый милости, во тьму кромешнюю, Всенепорочная.

         Кондак,глас 4:

         Честнаго образа Твоего явление,/ Пречистая Дево Богородице/ с верою взирающим бывает известное чаяние спасения,/ столпом бо облачным являеши предстательство,/ неусыпное за ны к Богу возсылающи моление,/ имже страну Сибирскую от всяких бед избави, молимся,/ да радостными усты вопием Ти вси:// радуйся, Владычице, Знамение милости Твоея нам являющая.

         Икос:

         Преславное Твоего явления во Абалаце чудо дивно всех утешает и укрепляет,Божиею бо в Тебе сущею благодатию ближайшая Богу бывши, всем познавшим Тя истинную Богородицу земнородным подаеши независтную исцеления радость, еюже вся земля Российская преизобильно обогатившися ныне, веселится непрестанно и вопиет Тебе с единоверными: радуйся, Владычице, Знамение милости Твоея нам являющая.

         Песнь 7

         Ирмос: От Иудеи дошедше, отроцы/ в Вавилоне иногда/ верою Троическою пламень пещный попраша, поюще:/ отцев Боже, благословен еси.

         Веселие мирское пресецы и душетленное пристрастие умертви во мне, Дево, презрение временных, желание вечных благ и нетленную радость подаждь ми с поющими: отцев Боже, благословен еси.

         Безчинное утешение и излишество, ум вредящее, душе скверну раждающее, отлучи от мене, Дево, и сподоби, телу здравие нуждное подавающи, житию же утешение довольное, предвкушением вечных благ наслаждатися купно с поющими: отцев Боже, благословен еси. Грехом, смерть лютую раждающим, оскверних и окалях душу мою, но Ты, Пречистая Владычице, очисти мя от сего, и настави на богоугодное житие, украси же воздержанием и благоговением, и даждь ми чистым сердцем пети: отцев Боже, благословен еси. Обнови мя, омраченнаго самолюбием, просвети светом образа Твоего Владычице,и похоти плотския укротивши во мне, сподоби мя Рождшемуся от Тебе непрестанно чистыми усты пети: отцев Боже, благословен еси.

         Песнь 8

         Ирмос: Царя Небеснаго,/ Егоже поют вои Ангельстии,/ хвалите и превозносите во вся веки. Возмущение души моея утоли, Всенепорочная, от клеветы наветующих избави мя, вражду греховную во мне укроти/ и ненависть с памятозлобием отврати от мене, Дево, да прославляю Тя, Чистая, во веки. Огнь ярости, во мне зело разжженный, росою благодати Твоея угаси, хулу, умножающую души моея озлобление, и всякий вид злобы, гнездящийся в сердце моем, искорени, Дево, да прославляю Тя, Чистая, во веки.

         Образ благодати Божия напиши, Всечистая, в души моей и печатию милости Твоея укрепи и утверди мя, да, всех злоб избавлен, мирными усты прославляю Тя, Чистая, во веки. Кротости и незлобия Твоего не отыми от мене, Пренепорочная Дево, терпение ми даруй твердое во искушении, да, радуяся, прославляю Тя, Чистая, во веки.

         Песнь 9

         Ирмос: Воистинну Богородицу/ Тя исповедуем,/ спасеннии Тобою, Дево Чистая,/ с безплотными лики Тя величающе. Скорби сердца моего отложи, уныние, презирающее благодать, отыми от мене и леность ко взысканию добродетели потреби огнем благодати Твоея, Чистая.

         Малодушием унывающаго мя оживи, отчаянием падшаго возстави, лишением и нерадением добрых мертваго воскреси, Дево, Жизнь безсмертную рождшая. Усердие во мне к Божией воли созижди благодатию Сына Твоего, ревность ко славе Божией воспламени в сердце моем, благоговение ко святыни Божией устрой и постоянство в благодеянии даруй ми, Дево, Предводительнице моего спасения. Любовь Небесныя сладости в недра души моея всади, попечение вечных благ свыше поели ми, умиление к покаянию и сокрушение к исправлению даждь ми, Дево, явлением святым Твоим душу мою озаряющи.

         Светилен,глас 6:

         Достойное днесь Матери, Творца всех рождшей, почтение воздадим, вернии. Сия бо явлением Своим дверь райскую отверзает, и нас от скверны очищает, и на враги стране нашей подает одоление. Слава, и ныне, тойже.

         На хвалитех стихиры, глас 4:

         Преславное Твое во Абалаце явление,/ Пренепорочная Владычице,/ недугующим есть исцеление,/ слепым прозрение,/ торжество спасительного с Богом примирения,/ оглашение соединения,/ свидетельство благоутробия Твоего,/ явственное усердныя любве ко грешным дарование/ и к истинному веры утверждению прилежное наставление. Ныне пророчестии глаголи исполняются:/ освятил есть селение Свое Вышний,/ Бог посреде его, и не подвижится./ Чудесы бо, Тобою во Абалаце бывшими,/ селение Его освящается,/ и Бог благодатию посреде сего пребывает выну,/ сего ради коварным ухищрением и вражиими наветы/ не подвижится во веки.

         Столпом явления Твоего облачным/ и росоносною Духа Благодатию/ исцели болезнующую мою совесть/ и омый душу мою, Владычице,/ и не яви мя врагом быти радование,/ но благодатию Пречистаго образа Твоего/ всю отжени от мене мглу страстей душевредную,/ просвети мя светом Сына Твоего,/ Всенепорочная Владычице.

         Слава, и ныне, глас 8:

         Приидите, Сибирстии народи,/ приидите, приступите и просветитеся,/ се бо во славе велицей Владычица Небесных чинов/ с чудотворцем и святителем Николаем/ и преподобною Мариею Египетскою/ пресветлым Своим приходит зраком,/ да спасет страну Сибирскую/ и град Тобольск и обитель Абалакскую./ О, паче ума чудо преславное!/ Како явлением чуднаго Твоего образа/ дуси лукавии прогоняются,/ болезни укрощаются,/ и все естество человеческое,/ вину избавления своего Тобою приимши,/ вопиет Ти, Всенепорочная:/ радуйся, Владычице, Знамение милости Твоея нам являющая.

         Славословие великое. Ектении. И отпуст.

         Молитва

         О, Пресвятая Госпоже, Дево Богородице, вышшая Херувимов и Серафимов, и святейшая всех святых! Ты, Всеблагая, во Абалаце икону Твою многоцелебную явити благоволила еси, и ею многая и неизреченная чудеса соделала еси, и ныне содеваеши, по Твоему неизреченному к нам милосердию. Тебе, Преблагословенней рода нашего Заступнице, припадаем и молимся вкупе со святителем Николаем и преподобною Мариею Египетскою ихже ходатайством в странствии сем земнем, многоскорбнем и многомятежнем, не лиши нас Твоего заступления и покрова державнаго. Спаси и защити нас, Владычице, от разжженных стрел лукаваго врага. Укрепи немощную волю к деланию заповедей Христовых, умягчи окаменелая сердца наша любовию к Богу и ближним нашим, даруй нам сокрушение сердечное и покаяние истинное, да, очистившеся от скверны греховныя, и избавльшеся от неведения и забвения, восставше от лености и нерадения нашего возможем принести Творцу благоугодныя Ему плоды добрых дел и сподобитися мирныя христианския кончины и ответа праваго на страшном и нелицеприятном Суде Его. О, Госпоже Всемилостивая! В час грозный смертный наипаче яви нам Твое многомощное заступление, ускори тогда на помощь к нам, безпомощным, и державною рукою Твоею исхити нас из власти лютаго миродержца, ибо воистинну много может молитва Твоя пред лицем Господа, и ничтоже невозможно ходатайству Твоему, аще токмо восхощеши. Темже, на снятый образ Твой умиленно взирающе и пред ним, яко живей Ти сущей с нами, покланяющеся, с упованием благим сами себе, и друг друга, и весь живот наш Тебе по Бозе молитвенно предаем и Тя величаем с рождшимся от Тебе Спасителем нашим, Господом Иисусом Христом, Емуже, со Безначальным Его Отцем и Пресвятым Духом, подобает всякая слава, честь и поклонение, ныне и присно и во веки веков. Аминь.

         Ина молитва

         О, Всеблагословенная Владычице, Богородице Дево. Приими ходатайством великаго святителя и чудотворца Николая вкупе с преподобною Мариею Египетскою сию молитву, Тебе ныне приносимую от нас недостойных рабов Твоих, к цельбоносному образу Твоему со умилением притекающих, яко Тебе Самой, ту Сущей и слышащей моления нас грешных и недостойных, и всех людей Твоих в стране нашей и на всяком месте с верою просящих благодатной помощи. О, Надеждо наша, Мати Божия, помози всем бедствующим, обидимым, больным, путешествующим, гладствующим, приюти сирот, православному воинству споборствуй, укрепи надеждою умирающих, упокой умерших, благослови всех детей, направи к добру всяку юность, укрепи в чистом житии возрастных, всяку старость соделай образом святыя жизни, всех грешников приведи к покаянию, истреби тьму язычества, неверия, ересей и расколов, просвети нас светом небесным, даруй мир душам нашим, всех введи в познание истины Божией, всех направи на истинный путь спасения и спаси нас. Аминь.

         Тропарь гл. 4:

         Днесь светло сияет во Абалаце/ образ Твой Пречистая Дево Богородице,/ и, яко солнце незаходимое,/ всегда верным подадеся,/ Егоже видяще на воздусе с предстоящими/ святителем премудрым Николаем/ и преподобною Мариею Египетскою,/ вдовица моляшеся Ти со слезами./ И мы, к Тебе притекающе, зовем:/ мир обители Твоей даруй// и душам нашим велию милость.

         Кондак гл.4:

         Честнаго образа Твоего явление,/ Пречистая Дево Богородице/ с верою взирающим бывает известное чаяние спасения,/ столпом бо облачным являеши предстательство,/ неусыпное за ны к Богу возсылающи моление,/ имже страну Сибирскую от всяких бед избави, молимся,/ да радостными усты вопием Ти вси:// радуйся, Владычице, Знамение милости Твоея нам являющая.

         Величание:

         Величаем Тя,/ Пресвятая Дево,/ Богоизбранная Отроковице/ и чтим образ Твой святый,/ имже точиши исцеления// всем с верою притекающим.

         Тропарь преподобному Мисаилу Абалацкому:

    19 августа (1 сентября 1852 преставление)
    10 ( 23 июня Прославление в Соборе Сибирских святых)

         Тропарь, глас 4:

         Церкви Православныя усердный служителю/ и пастырем ея благодушный помощниче/ отроков учащихся дивный наставниче/ житие свое в трудах священных до кончины провождал еси/ и блаженное успение восприял еси,/ преподобие отче наш Мисаиле,// моли Христа Бога спастися душам нашим.

         Кондак,глас 3:

         Церкви Христовой светильниче,/ Абалацкия обители заступниче,/ града Тобольска преславное украшение,/ преподобие отче Мисаиле,/ непрестанно моли Царя Христа// спастися душам нашим. Величание. Ублажаем тя,/ преподобне отче Мисаиле,/ и чтим святую память твою,/ наставниче монахов// и собеседниче ангелов.